Merci de votre compréhension.
Archive de nos THEMES
RUBRIQUES: Archives de nos THEMES |
| hlub peb tug yeebncuab : puas zaam txim rua nwg ? ( Par Kong Ming Vang, Mars 2008) Vaajtswv Txujlug tshwjxeeb phau Tshab yeej qha meej tas « hlub mej cov yeebncuab hab thov Vaajtswv paab rua cov kws tsimtxom mej » (Mathais 5 :44). Yexus tseem qha ntxiv rua nwg cov thwjtim tas thaum kws puab thov Vaajtswv, puab yuavtsum thov Vaajtswv zaam puab lub txim ib yaam le puab tub zaam txim rua cov kws ua txhum rua puab lawm hab (Mathais 6 :12). Mathais pum has tas yaam kws yuav paab tau Vaajtswv cov mivnyuas nyob sis hum xeeb, muaj kev sis tsaug zoo, yog vim puab txawj zaam txim ib leeg rua ib leeg xwb (Mathais 18).Tug kws tsi kheev zaam txim rua lwm tug, tug ntawd yuav tsi tau txais Vaaj Leej Txiv txuj kev zaam txim tuab yaam nkaus hab (Mathais 18 :35). Vaajtswv Txujlug, phau Qub hab phau Tshab, yeej qha has tas Vaajtswv yog tug Vaajtswv kws muaj txuj kev hlub, muaj kev zaam txim ntau dlua le tug Vaajtswv kws rau txim (Nehemis 9 :17 ; Ntawv Nkauj 85 :3 ; Lukas 24 :47...). Qhov luj tshaaj plawg yog Vaajtswv zaam peb lub txim vim Tswv Yexus txuj kev tuag theem peb txhoj. Yog le ntawd, Vaajtswv xaav kuam peb txhua tug kws tau txais Vaajtswv txuj kev zaam txim lawm, zaam tuab yaam nkaus rua tug kws tau ua txhum rua peb hab. Tub yaam ntxwv nuav yog ib tug yaam ntxwv zoo kws peb suavdlawg yuav tau xyum ua (Efexus 5 :1) sub peb txhaj yuav au lawm le Vaajtswv tug dlej sab. Tabsis yog peb xaav tas txuj kev zaam txim siv moog le nuav xwb, peb kuj totaub yuam kev lawm hab ! Vaajtswv Txujlug qha meej tas tsi yog vim Vaajtswv tub xub xaiv peb lawm (Loos 8 :29) es peb yuav moog xaav tas Vaajtswv yeej ib txhab ib txhis zaam peb tej kev txhum lawm. Tsi yog vim Tswv Yexus tau lug tuag sau tug ntoo khaublig muaj 2000 xyoo lawm es peb yuav moog xaav tas peb txhua tug dlim peb lug txim taag tug. Tabsis Vaajtswv Txujlug qha has tas yog thaum kws peb tig lug cuag Vaajtswv hab leeg peb txuj kev txhum, Vaajtswv txhaj zaam peb lub txim xwb (Yaxaya 55 :7 ; Ntawv Nkauj 86 :5...). Vaajtswv txuj kev zaam txim tsi yog laam tau laam muab « automatique » rua txhua tug tabsis yog rua tug kws leeg tas nwg yeej ua tsi yog lawm, nwg yeej yuav kev hab xaav rov qaab lug sis tsaug zoo nrug Vaajtswv. Yexus txuj kev tuag kws ntxuav tau tuabneeg lub txim, tsi yog suavdlawg yuav tau txais (Malakaus 10 :45 ; 14 :24 has tas « ntau leej ») tabsis yog rua cov kws ntseeg Nwg ! (Yauhaas 3 :16). Txuj kev zaam txim qha has tas muaj ib tug kws ua txhum hab ib tug kws tiv txuj kev pheem. Yog le ntawd txuj kev zaam txim muaj kuab yog thaum kws tug ua thxum leeg nwg lub txim hab tug kws tiv txuj kev pheem, zaam tug ntawm lub txim. Tseeb tag Vaajtswv Txujlug yeej txhawb ntau dlua tug kws tiv txuj kev phem kuam nwg zoo sab hlo zaam txim vim Vaajtswv yog tug puv npo txuj kev hlub. Nyob rua huv Yauhaas 21 :15-19, peb pum ob tug tuabneeg rov qaab lug sis raug zoo : Yexus caw Petus lug leeg nwg kev txhum hab txais yuav Yexus kev zaam txim. Peb cov ntseeg yuavtsum xyum Vaajtswv tug yaam ntxwv : hlub peb tug yeebncuab, xaav kuam nwg lug txais peb txuj kev zaam txim. Yog nwg leeg tag tag nwg txuj kev txhum lawm, yuav tau zam txim pub rua nwg hab (Lukas 17 :3-4). Yog peb hlub nwg peb yuav tau qha nwg txuj kev txhum hab caw nwg lug cuag Vaajtswv vim taagnrho cov kev txhum yog ua txhum Vaajtswv ua ntej. Ncu ntsoov tas peb tsi yog lug tawm tsaam peb ib leeg tabsis yog tawm tsaam txuj kev txhum ! Kong Ming Vang Retour en haut de page ___________________________________________________________________ ___________________________________________________________________ Txuj koobmoov kwv vaajtswv pub (Txoog Neng Vang, publié Mars 2008) Mathais 25:14-30 Tswv Yexus has ib zaaj lug pevtxwv txug ib tug tswv tau muab nyaj rua 3 tug tub qhe coj moog ua luam. Tug ib tau 50 choj, tug ob tau 20 choj hab tug peb tau 10 choj. Thaus tug tswv rov lug, tug tub qhe kws tau 50 choj coj cov nyaj moog ua luam tsaam 50 choj ntxiv, tug tau 20 choj los coj moog ua tsaam 20 choj ntxiv, tabsis tug tau 10 choj nwg coj moog FAUS zoo-zoo ca xwb. Lulug "Nyaj" huv vaajlugkub tshab "Talent" "nyaj txag" yog ib yaam kws siv ua teev kiv saib yam twg nyaav, yog has txug tej PEEVXWM losis tej KEV TXAWJ NTSE kws peb muaj. Tug tswv muab cov nyaj ntawd rua 3 tug tub qhe, tabsis cov nyaj ntawd tseem yog tug tswv le, nwg muab qev rua puab coj moog ua luam kuas tsaam paaj xwb. Lwm nub tug tswv yuav rovqaab lug sau yaam kws tug tub qhe coj moog ua luam saib tau paaj los poob peev.. Peb yuav totaub txug zaaj 3 tug tub qhe, ca peb muab has lenuav: 1. TALENT "Nyaj txag" Vaajtswv tau muab Talent rua peb txhua tug coj moog siv kuas muaj nujnqes rua Vaajtswv. Talent yog txhua yaam kws Vaajtswv pub rua peb muaj huv peb lub neej, yogle peb yuav tau muab siv kuas muaj nujnqes. 2. TALENT yog yam kws Vaajtswv muab COB rua peb, Vaajtswv muab talent ntau heev rua peb xwsle: Caijnyoog, dlaagzug, tswvyim, kev txawj ntse, nyaj txag, tej khoom kws peb muaj, lub peevxwm kws peb ua tau, kev ua phoojywg nrug lwm tug etc.... Koj yuav tau nug koj tug kheej saib Vaajtswv muab yaam Talent dlaabtsi rua koj? Koj puas tau muab rhu lug siv? Los koj muab faus le tug tub qhe kws tau 10 choj. 1 Petus 4:10 "Vaajtswv pub tswvyim txhua yaam rua peb txhua tug," tabsis txhua tug yuav tsi tau lub tswvyim ibyaam le 3 tug tub qhe. Nqai Vaajlugkub nuav qha rua peb tas "Vaajtswv pub koobmoov rua peb txhua tug, yogle peb yuavtsum tau muab siv kuas muaj nujnqes rua Vaajtswv." Yakaunpaus 1:17 "Tej koobmoov ntawd yog lug ntawm Vaajtswv lug xwb." Vim lenuav, peb yuav tau muab siv rov rua Vaajtswv, xob muab khaws ca lossis puag pw, nyob tsaam tug tswv rovlug peb yuav txaaj muag hab yuav tusab heev. 1 Kauleethaus 4:7 "Txhua yaam kws peb muaj puavleej yog Vaajtswv muab pub rua peb, peb tsi xob khaav hastas yog peb khwv tau." Nco ntsoov hastas, thaus peb poob dlejnum, peb thov Vaajtswv ua nub ua mo kuas tau dlejnum ua, thaus tau dlejnum ua lawm peb txawm muab peb cov TALENT faus tseg tsi kaam rhu siv, cale tsi ncu Vaajtswv txaj ntsig le lawm. Xaus: Lub ntsablug tseeb ntawm zaaj lug pevtxwv muab nyaj rua 3 tug tub qhe yog: "... Tug tswv xaav kuas cov tub qhe siv yaam kws puab tau kuas muaj nujnqes rua tug tswv thaus nwg rovlug". Tej talent ntawd yog has txug yaam kws Vaajtswv muab COB rua peb. Peb tau lub peevxwm luj hab miv los yuav tau muab siv kuas muaj nujnqes, ua ncaajnceeg rua tug TSWV. Yog peb muab coj moog faus tseg xwb, ib nub tug Tswv rovlug, nwg yuav txavtxim ncaajncee lawvle nwg teg num. Vaajtswv yuav muab nqe zug rua txhua tug kws coj NCAAJNCEEG. Hab yuav txavtxim rua tug kws coj tsi ncaajnceeg le tug tub qhe kws tau 10 choj. Peb tsi xob xaav hastas kuv tsi txawj, tsi paub dlaabtsi es nyob twbywm tsi quavntsej txug Vaajtswv teg dlejnum, ncuntsoov hastas "TALENT" yog txhua yaam KOOBMOOV kws Vaajtswv muab rua koj lub neej. Kuv yeej ntseeg hastas peb ibleeg yeej tau ib qhov talent txawv lawm ib leeg. Siv peb cov Talent, txuj koobmoov ntawd kuas muaj nujnqes rov rua Vaajtswv. Txooj Neeb Vaaj Retour en haut de page ____________________________________________________________________ ____________________________________________________________________ Xaav tau txujsa (Txoog neeg vang, publié Avril 2008) Mathais 19:16-24 Muaj ib zag muaj ib tug hluas npluanuj tuaj cuag Yexus hab nug Yexus hastas "Xwbfwb yaam twg yog yaam kws zoo kws kuv yuavtsum ua, kuv txha tau txujsa ntev dlhawv moog ibtxhis?" Yexus teb hastas "Vimlecaag koj nug kuv has txug yaam twg yog yaam zoo? Tsuas muaj tuab tug txha yog tug zoo xwb. Yog koj xaav tau txujsa, koj yuavtsum coj lawvle txujkev cai" Nwg teb Yexus hastas kuv yeej coj tau txhua nqai thaus tseem yau lug lawm. Yexus has rua nwg ntxiv hastas yogle, cale moog muab koj cov khoom muag hab muab pub rua cov tuabneeg pluag, koj txha npluajnuj sau ntuj, hab lug nrug kuv moog. Thaus tug hluas npluajnuj nov Yexus has lenuav, nwg nyuaj sab hab tawm lawm, rua qhov nwg npluanuj heev. Nyob rua nqai Vaajlugkub nuav peb pum hastas yaam kws tug hluas nuav xaa tau yog, "TXUJSA NTEV DLHAWV MOOG IBTXHIS." Yaam kws tug hluas nuav muaj yog; 1) Ntseeg Vaajtswv heev; 2) Npluanuj heev; 3) Tseem hluas; 4) Noog lug heev; 5) Ncaajnceeg heev. Yog muab saib tug hluas nuav kuj xaav ua Yexus dlejnum heev, Tabsis qhov teebmeem rua nwg mas yog nwg tseem muaj dlua "IB TUG TSWV" nwg tug tswv yog "NYAJTXAG". Mathais 6:24 hastas " Tsi muaj leejtwg yuav ua qhev tau rua ob tug tswv, yog nwg ua lentawd, nwg yuav ntxub ibtug nyam ibtug." Tug hluas nuav nwg PE Vaajtswv hab PE Nyajtxag. Tsivdlim 20:3 hastas "Tsi xob pe lwm tug Vaajtswv, tabsis pe kuv tuableeg xwb" Yauj 31:24-28 Kuv yeej ibtxwm tsi casab rua tej nyajtxag lossis tso sab rua kev npluanuj. Kuv tsi tau pe lub nub kws ci ntsaa ab lossis pe lub hli thaus taabtom nraa. Kuv tsi tau nwj kuv txhaisteg hawm tej ntawd ua rua kuv yuamkev ib zag le. Tug kws ua txhum lentawd, tsimnyog raug txim tuag; rua qhov nwg saib tsi taug Vaajtswv tug kws muaj fwjchim luj kawg nkaus. Yog muab saib, tug hluas nuav nwg tsi ncaajnceeg rua Vaajtswv, vim qhov tseemceeb tshaaj plawg huv nwg lub neej yog NYAJTXAG. Nwg yeej xaav pe Vaajtswv, rua qhov nwg yeej leeg hastas nwg coj Vaajtswv txuj kevcai thaus yau lug lawm. Tabsis nwg muab kev npluajnuj saib tseemceeb dlua kev pehawm Vaajtswv, vim peb paub tau hastas nwg cale TAWM MOOG YAAM NTHXUV SAB TSAWV LAWM. * Yexus qha hastas: Tug kws yuav txais txujsa ntev dlhawv moog ibtxhis moog nyob huv Vaajtswv lub tebchaws, tug ntawd yuavtsum tau HLOOV nwg lub sab hab LEEG TXIM mas txha yuav muaj feem txais tau. Nwg yuav tau tso nwg tug tswv kev npluanuj, muab tej khoom kws nwg muaj muag hab muab pub rua cov txomnyem; dlhau ntawd yuav tau TIG lug PE YEXUS, muab Yexus ua tug TSWV thib ib ntawm nwg lub neej uantej nyajtxag. Tswv Yexus hastas, NYUAJ HEEV rua ib tug npluanuj, yog yuav ca Vaajtswv kaav, vim nwg tej nyajtxag khoom siv nqug nwg, ua rua nwg muab Vaajtswv rhu tawm ntawm nwg lub neej. Vim lenuav Yexus txha siv ob lub cim ntawm nqai 24 txug "Tug ntxhuav hab lub Qhov koob" * Kev twv txaj: Kev ntshaw nyaj txag yog ib qhov yuav nqug yug ncaim ntawm Vaajtswv, najnub nwg nuav muaj ntau qhov kev TWV NYAJ TWV TXAJ, coob coob tug tau qaug rua txujkev nuav, ua rua puab tso Vaajtswv tseg. Yaxayas 65:11-12 hastas "Mej cov kws tso Vaajtswv tseg, hab novqaab lub roob dlawbhuv lawm, mej pe tug dlaab NKAS hab MENIS kws yog dlaab pheej moo hab xaav paub yaav pegsuab, kuv yuav rau txim rua mej" Nuav yog Vaajtswv tshev tsaav tuabneeg Yixalayees, vim puab pheej tsi tso sab rua Vaajtswv. Naj nub nwg nuav peb coob leej nyam moog pe tej (vaajtswv) dlaab pheej moo heev, xwsle moog sai teg, saib moov, nyam moog casino, yuav loto, yuav leb neeg hab lwm yaam kuas tsaam nyaj rua yug. Tej kws puab nyam ua lentawd vim puab tsi casab rua Vaajtswv yuav paab tau puab, yuav cawm tau puab, puab muab Vaajtswv tso tseg. * Vaajtswv yog tug tswj txhua yaam hab muaj sab dlawb sab zoo: 1 Timautes 6:17-19 Kx.Polos sau tsaab ntawv moog rua Timautes hastas, " Koj has rua cov Npluanuj tsi xob khaavtheeb, tsi xob casab rua puab tej nyaj txag hab qhov txhua chaw, rua qhov tej ntawd yuav pluj moog. Tabsis kuas puab casab rua Vaajtswv tug kws muaj sab dlawb sab zoo hab pub txhua yaam rua peb, kuas peb muaj kev zoo sab". Nqai Vaajlugkub nuav qha tau tas, kev muaj txag npluanuj nwg tsi ruaj tsi khov, tsi xob casab rua tej ntawd, yuav tau casab rua Vaajtswv, zoo sab hlo muab yaam yug muaj pub rua cov txomnyem. Mathais 6:19 txha hastas, peb tsi xob khaws nyaj txag rua huv nplajteb nuav, yuav tau khaws rua sau ntuj, vim nyob rua sau ntuj txha yog qhov chaw ruaj khov moog ibtxhis. Xaus: Tsi tau txhais hastas peb cov ntseeg tsi xob moog khwv nyaj txag, tseeb tag nyaj txag yog ib yaam kws peb yuavtsum muaj txha nyob taug. Tabsis kuas peb feevfaaj tsi xob ca Nyajtxag ua peb tug tswv, nyob tsaam peb tso Vaajtswv tseg. Tej khoom ntawd yeej tsi ruaj tsi khov, Vaajtswv xaav kuas peb muaj lub sab dlawb sab zoo, muab tej kws peb muaj moog paab cov txomnyem, Vim Tswv Yexus tub muab Nwg txujsa pub dlawb rua peb. Ncu ntsoov hastas yog peb pe ob tug tswv, peb yuav nyam ib tug hab yuav ntxub ib tug. Tsi xob ca tug vaajtswv ntawm kev npluanuj "NYAJTXAG" ua rua peb tso Vaajtswv tseg, tsi xob txhawj-txhawj yug lub neej, khwv nruab nub mo ntuj, tsi muaj caij moog nrhav Vaajtswv, moog pehawm Vaajtswv, tsi ncu khaws nyaj txag ca rua sau ntuj. Tsi xob novqaab Yexus cov lug has rua tug npluaj hastas " Moog....! Rov moog tsev, moog muab koj tej khoom muag hab coj moog pub rua cov txomnyem hab lug nrug kuv moog." Nub nua Yexus yuav has rua koj lentawd hab. "Peb yuav nrug Tswv Yexus moog lug ntawm lub ntsej muag luag ntxhi lossis yuav tawm moog ua tug ntsej muag ntshaus ntshov ?" Txoog Neeg Vaag YEXUS YOG LEEJTWG TAG RUA KOJ ? (Mathais 16 :13-16) Thaum Yexus nug nwg cov thwjtim tas, cov pejxeem Yudais xaav le caag txug Yexus ? Cov thwjtim teb tas : « ib txhaj xaav tas koj yuav yog Yauhaas Npatitus. Lwm tug xaav tas ntshe koj yog Eliyas los yog Yelemis los yog ib tug ntawm cov Cev Vaajtswv lug ». Yexus nug puab tas : « mej neb, mej xaav tas kuv yog leejtwg tag ? » Petus tuableeg xwb txhaj le teb tas : « Koj yog tug Mexiyas, koj yog Vaajtswv tug Tub ntaag » Kuv saib peb cov kws ntseeg Vaajtswv peb zoo le cov thwjtim hab : ntawm 12 tug thwjtim rua muaj ib tug xwb (Petus) kws txhaj le saib Yexus zoo le nwg tug Tswv hab nwg tug Cawmseej tag. 11 tug thwjtim kws tshuav, zoo nkaus puab tsi paub meej tas Yexus yog leejtwg rua puab ! Yog muab piv rua zaaj nuav ces peb cov ntseeg Vaajtswv coob heev tabsis tsua muaj tsawg tug kws muab Yexus saib le puab tug Tswv hab tug Cawmseej tag tag huv puab lub neej. Yog le ntawd naj nub nua, tsimnyog peb cov nsteeg Vaajtswv, peb yuav tau saib qhov nuav kuas meej : Yexus yog leejtwg tag rua peb ? Thaus peb lug ntseeg Vaajtswv peb yeej paub tas Yexus yog Vaajtswv tug tub hab nwg yog peb tug Cawmseej tuag theej peb lub txim kuam peb dlim. Yog peb ntseeg tug Yexus ntawd, peb yuav tau txuj sa ntev dlhawv moog ib txhis. Feem ntau qhov nuav yog peb paub lug ntawm kev noog lug qhuab qha ntawm cov Xf hab TL los yog ntawm kev kawm Vaajlug kub (kawm nub kaaj, TEE, …). Yog muab saib ces zoo nkaus yog tej yaam kws peb tub nov ntev lug lawm los yog tej yaam kws peb ib txwm paub lawm. Tabsis yaam kws yug paub hab nov (connaissance) txawv yaam kws yug ntseeg hab nqeg teg ua (foi et intégration dans nos vies). Tej yaam kws peb ib txwm paub yog tej yaam kws peb tsi tshuam saib zoo los yog peb tsi ceevfaaj saib seb yaam ntawd puas muaj nuj nqe le caag rua peb ? Peb ntseeg tas Yexus yog peb tug Tswv hab peb tug Cawmseej tabsis txhua txhua nub kws peb ntseeg Yexus hab peb caum nwg qaab, peb puas muab Yexus saib le peb tug Tswv, peb tug Cawmseej tag tag los yog peb muab nwg tso rua qhov twg lawm hab ? Yexus yog leejtwg tag rua koj ? Yog tas Yexus yog peb tug Tswv tag hab nwg yog peb tug Cawmseej, ces txhua yaam kws peb ua, peb has hab peb xaav yeej yuav tsum lug xaus rua ntawm Yexus ntaag, rua qhov nwg yog peb tug Tswv lawm. Txhais tau tas yog peb ua ib yaam dlaabtsi, uantej ua yaam ntawd : tug Tswv puas txaus sab los tsi txaus rua yaam peb yuav ua ntawd? Yog peb siv ib cov lug, yaam kws peb has tawm ntawm peb lub nkauj, Yaam ntawd Yexus puas tau ntsej muag hab los tsi tau ? Yog tas thaum peb pum peb ib tug yeebncuab los yog ib tug kws peb tsi nyam, yaam kws peb xaav txug tug ntawd los yog peb coj ib tug cwjpwm, yaam kws peb xaav hab peb cov tug cwjpwm ntawd, peb tug Tswv puas tau ntsej muag ? Yog tas peb leeg tag tag tas Yexus yog peb tug Tswv lawm, nwg dlhau ua tug Tswv kws kaav txhua ceg huv peb lub neej : nwg kaav peb lub sab, peb kev xaav, kev has lug, peb tug cwjpwm, peb dlejnum, … Yog tas peb tsi tso nwg kaav txhua ceg ntawm peb lub neej ces txhais tau tas peb tsi saib nwg zoo le nwg yog peb tug Tswv tag. Peb rua laam ntseeg nwg xwb ! Siv cov lug tas nwg yog peb tug Tswv hab peb tug Cawmseej. Tabsis qhov tseeb peb tub tsis ntseeg le peb cov lug has ntawd hab peb tub tsi kaav tso nwg kaav peb lub sab, lub neej. Peb tseem yuav yog tug tswj peb lub neej ua le peb lub sab ntshaw. Peb tug tswv ces yog peb xwb tsi yog Tswv Yexus lawm. Thaum zoo le nuav ces Yexus yeej tsi yog peb tug Tswv hab peb tug Cawmseej le. Qee tug has tas peb yeej ua tsi tau le ntawd ib zag vim peb tseem yog tuab neeg txhum. Tseeb tag, peb kev ntseeg hab kev caum Yexus ces tsi yog ua kuas tau txhua yaam zoo tuab txhij xwb. Yeej tsi tau ! Tabsis peb dlejnum ces yog xyum, xyum ntxiv, xyum taag los rov xyum ntxiv ... moog txug nub Yexus yuav rov lug. Yog peb ua le ntawd, muaj ib nub twg peb yuav dlhau moog ua ib tug tuabneeg dlawbhuv hab zoo kawg nkaus … ib tug tuabneeg kws Tswv Yexus kaav taagbrho nwg lub sab, lub ntsws, lub neej huv tuabsi lawm. Thaus ntawd peb txhaj le siv tau cov lug tas : YEXUS YOG KUV TUG TSWV HAB KUV TUG CAWMSEEJ ! Qee yaam kws pheej tsi paab peb cov ntseeg ca Yexus lug ua peb tug Tswv hab peb tug Cawmseej tag yog vim :
Yexus yog leejtwg tag rua koj ? Xaav tuab zoo seb koj yuav teb le caag txug lu lug nuav ? Peb cov kws yog Vaajtswv cov mivnyuas lawm, tsimnyog peb yuav tsum paub teb lu lug nuag meej nplha hab coj / nqeg teg ua lawv le peb kev ntseeg ntawd : nwg tsi yog ib txuj kev paub xwb tabsis yuav tsum yog ib qhov kws peb ntseeg lawm hab peb nqeg teg ua kag yaam kws peb ntseeg ntawd. Xaav tuab zoo, vim yuav muaj ib nub twg, luas yuav noog koj tas : Yexus yog leejtwg tag rua koj ? nub ntawd, koj yuav tau teb kuas meej rua nwg, koj yuav teb tsi tau tom ntej tom qaab. Los yog muab piv le nuav : peb txhua tug ntseeg yeej xaav moog saum ntuj ceebtsheej, tabsis yov Vaajtswv cov timtswv yuav noog peb tas : Yexus yog leejtwg tag rua koj ? Yog koj teb tau lu lug nuav hab coj tau le koj has ces koj txhaj le muaj feem moog nrug Vaajtswv nyob ! Yog tas yog Koj neb, koj yuav teb lecaag rua cov timtswv ntawd ? Cov ntseeg rau sab coj lub neej nyob huv qaab kev tswjfwm ntawm Tswv Yexus : nwg yog peb tug Tswv hab tug Cawmseej lawm. Cale ca nwg lug kaav peb xob ua sab tawv, sab dleb. Thov Vaajtswv tuav peb kev ntseeg kuas peb yuav txawj muab Yexus tsaa ua peb tug Tswv hab peb tug Cawmseej ! Xf Laujtuam Xyooj. |
RUBRIQUES: Archives de nos ANNONCES | ||
|
RUBRIQUES: Archives de nos INFORMATIONS |
Ex: Titre ( publié le 21/03/2008) Par NOM. |
