Keebkwm (Historique)

KEEBKWM PAWG NTSEEG GRIGNY EELF :

* Xyoo 1976-1978. Kx. Thongsuk (yog ib tug Xf nyaablaaj txawj has lug nplog) ua Xf rua pawg ntseeg hab thaus ntawd muaj cov tswvcuab le nraag nuav : Tswj Yig Vaaj tsevneeg ( taamsim nuav nyob St-Paul, USA), Ntshab Xaab Vaaj tsevneeg (taamsim nuav nyob Guyane), Kx. Thongsuk (taamsim nuav nyob USA), Kx. Tswv Kuam Thoj lug tim tebchaws Malaisie lug txug, Xyooj khwb tsevneeg, Haam Yag tsevneeg, Haam Tswv Tub tsevneeg, Colonel Hang Tswv Choj tsevneeg nrug rua 2, 3 yim kwvtij nplog. Thaus nuav cov ntseeg pehawm Vaajtswv nyob rua ntawm 16, rue Rieux 92100 Boulogne-Billancourt ze ntawm Paris saab nub poob.

* Xyoo 1979. Nubtim 20.11.79, pawg ntseeg tau raug tsim tsaa ua ib pawg ntseeg lawv le numtswv Faabkis txuj kevlig kevcai (association Cultuelle 1905). Rooj saab laaj txhaj txavtxim sab yuav lub npe « Cov ntseeg Yexus Lostsuas nyob Faabkis teb » (Église Évangélique Laotienne en France, E.E.L.F.). Vim lecaag txha xaiv lub npe E.E.L.F nuav ? Rua qhov thaus ntawd suavdlawg nyav nyuas tsiv tebchaws Lostsuas tuaj txug Faabkis teb, pawg ntseeg cov tswvcuab kuj muaj yim puav kwvtij Lostsuas koom nrug hab, yog le suavdlawg txhaj txav txim sab has tas : txawm yog cov ntseeg muaj moob coob dlua los suavdlawg yeej yog tuab haivneeg nplog ces ca yuav lub npe ntawd txhaj le tsi xaiv leejtwg ntsej muag. Vim le has sau nuav cov ntseeg txhaj txav txim sab xaiv lub npe “E.E.L.F” lug txug rua najnub nua.

* Xyoo 1979-1989. Cov tswvcuab tuaj coob quaszug, pawg ntseeg txhaj rhais chaw lug pehawm Vaajtswv nyob rua huv lub tuamtsev American Church 65, quai d’Orsay 75007 Paris. Thaus lub qaab xyoo 1989 lub 10 hli ntuj Kx. Thongsuk tsev tuabneeg tau ncaim pawg ntseeg moog rua tebchaws Amelikas.

* Qaab xyoo 1989-1990. Pawg ntseeg tsi muaj xwbfwb, cov tsaavxwm yog cov kws coj pawg ntseeg xws le : Kl. Ntshab Xaab Vaaj, Kl. Tswv Tub Haam, Kl. Ntxhw Looj Haam, Kl. Ntxoov Xaab Muas, Kl. Txooj Neeb Vaaj hab Kl. Saub Yaaj Haam yog cov ua dlejnum saib pawg ntseeg tog tug xwbfwb tshab.

* Xyoo 1990-1991. Pawg ntseeg txhaj thov Koomhum Moob District tebchaws Amelikas, puab txhaj tso Xf Cai Hawj (taamsim nuav nyob Sacramento, USA) tuaj paab pawg ntseeg tau ib lub xyoo. Tuab lub caij nuav pawg ntseeg tau hloov chaw pehawm rua ntawm lub tuamtsev Église Réformée kws nyob Ris-orangis (xeev 91) vim cov tswvcuab feemcoob nyob rua ib cheeb tsaam 91.

* Xyoo 1992-2002. Lub 9 hli ntuj xyoo 1992, Xf Tswv Oudone Lis tau kawm Vaaj lug kub tav huv lub tsev Institut Biblique de Lamorlaye, lug ua xwbfwb rua pawg ntseeg. Xyoo 1996, pawg ntseeg tau rhais chaw ntawm lub tuamtsev Eglise Réformée de Ris-Orangis lug pehawm Vaajtswv rua ntawm lub tuamtsev Église Protestante Réformée de la Balise kws nyob Ste-Geneviève-des-Bois (xeev 91). Qhov pheej hloov chaw nuav yog vim pawg ntseeg cov tswvcuab coob zuj quaszug tsi muaj chaw txaus rua cov ntseeg pehawm Vaajtswv. Nubtim 31.05.02, Xf Tswv Oudone tsevneeg tau ncaim pawg ntseeg moog rua tebchaws Guyane Française moog paab pawg ntseeg Iracoubo lawm. Xf Tswv Oudone tau lug ua Xf rua pawg ntseeg tau 10 lub xyoos.

* Xyoo 2002-2008. Tomqaab Xf Tswv Oudone ncaim pawg ntseeg lawm, Laujtuam Xyooj tau kawm tav Vaajlug kub ntawm lub tsev Institut Biblique de Nogent/Marne. Nwg tau lug ua xwbfwb rua pawg ntseeg txij lub 8 hlis 2002 lug rua najnub nua.

* Pawg ntseeg EELF tub tsaug tsim tsaa muaj 29 xyoo officiels lawm. Kuj muaj 4 tug xwbfwb paab pawg ntseeg hab cov ntseeg pib chiv xyoo 1978 lug ntawm 12 yim (taagnrho muaj 24 tug tswvcuab) nce moog rua 69 yim kws yog muaj 146 tug tswvcuab officiels nub nua.