« Tug TSWV yog tug tsomkwm kuv, kuv muaj txhua yaam txaus, nwg ca kuv su huv lub tshaav kws muaj zaub mog nyoos ntsuab xab hab nwg coj kuv moog rua ntawm lub paag dlej ntshab kws nyob ntsag tu » - Phoo Ntawv Nkauj 23 :1-2.
Cov nqai Vaajluskub sau nuav tsi yoojyim rua peb kev totaub thaum kws peb ntsib tej xwmtxheej zoo le tej lub caij nyoog kws tuabneeg nplajteb thoob qaab ntuj taab tom ntsib.
Suavdlawg poob dlej poob num zum zawg, tsi muaj nyaj txag siv, nqe vaaj nqe tsev kim zuj zug, zoo nkaus le nrhav noj nrhav haus ib nub dlau ib nub lawm xwb.
Cov tub txawg tub ntse kws saib kev ua laag ua luam nyob thoob qaab ntuj has tas xyoo 2009 nuav yog ib xyoo kws yuav nyuaj heev (année de récession).
Vim pawg ntseeg yog ib paab tuabneeg kws yog quaspuj hab txivneej lug sis koom teg hab vim puab tseem noj nyob huv qaab ntuj nuav, yog le ntawd yog kev noj haus hab kev ua laag ua luam moog tsi taug lawm, thaum ntawd yuav tsi yoojyim rua pawg ntseeg hab.
Thaum kws zoo le nuav lawm peb cov kws ntseeg Vaajtswv, peb yuav tau coj tug cwjpwm zoo le caag tag ? Vaajtswv Txujlug tshwjxeeb le nqai sau nuav yuav qha dlaabtsi paab tau peb ?
Muaj ntau zag thaum peb ntsib tej yaam xwmtxheej huv peb lug neej, peb nyam moog nrhav nyob rua huv Vaajtswv Txujlug saib puas muaj tej nqai kws yuav teb tau peb los yog paab tau peb. Pevxaam le nuav yog peb ntsib kev nyuaj sab ntxhuv plawv kev quaj ntsuam, peb yuav moog nyeem phoo Yauj ntau dlua. Yog peb muaj ib tug hlub los yog peb nyam leejtwg, peb yuav moog nyeem phau Xalumoos tej nkauj ntau dlua.
Yeej zoo kawg lawm hab tabsis peb yuav tau ceevfaaj ! Peb tsi txhob siv Vaajtswv Txujlug lawv le peb lub sab xaav los yog khaws yaam kws peb nyam xwb. Peb tsimnyog nyeem hab ua lawv le Vaajtswv Txujlug qha lawv le 66 phoo sub peb txujkev ntseeg txha yuav noj qaab nyob zoo.
Nyob rua huv Phoo Ntawv Nkauj 23, Daviv qha has tas Vaajtswv yog nwg tug Tswv yug yaaj hab nwg yog Vaajtswv tug mivnyuas yaaj.
Au ntej Daviv yog Vaajntxwv, nwg yog ib tug tub yug yaaj. Nwg paub txuj dlejnum nuav zoo : tu cov yaaj, saib puab kev noj haus, tawm tsaam puab cov yeebncuab kws yog tsuv hab maa. Nwg paub txhua txhua tug lub npe. Yog leejtwg ceg tawv los tsi noj qaab nyob zoo, nwg paub hab cawm tug ntawd. Yog leejtwg tsi noog lug hab dlha tawm ntawm lub nkuaj los tug tswv paub hab moog coj nwg lug.
Daviv tug Vaajtswv yog tug zoo le ntawd ntaag !
Txawm yog nwg nyob rua qhov chaw tsaus ntuj nti los Daviv tsi txhawj tsi ntshai vim nwg ntseeg tas nwg tug Tswv ua nwg tug kwvluag.
Vaajtswv puas yog peb tug Tswv yug yaaj hab ? Peb puas ca sab tau rua nwg, ca nwg tsomkwm peb nrug nwg tug paas hab nwg tug cwj nreg tshwjxeeb thaum peb ntsib tej yaam xwmtxheej zoo le naj nub nwgnuav ?
Lug caij nyoog nuav zoo nkaus le peb taag tom taug txujkev tsaus ntuj nti lawv le nqai 4 qha. Ib feem cov tswvcuab yuav poob dlejnum los yog tug poob lawm, ib feem yuav tau hloov dlejnum, ntau tug yuav muaj kev txav txim sab tseem ceeb rua lub caij nuav…Zoo nkaus le lub ntuj tsaus nti tsi pum qaab yuav ua zaaj twg!
Txawm yog le caag los ncu ntsoov tas peb tug Vaajtswv tseem nrug peb taug kev uake.
Nqai 4 tsi tau qha has tas tsi pub txujkev tsaus ntuj nti lug raug peb cov ntseeg tabsis nwg qha has tas peb tug Tswv yuav nrug peb taug kev uake. Nwg qha ntxiv has tas yog peb tso nwg tug paas hab nwg tug cwj nreg tsomkwm peb, peb txhaj le yuav tsi ntshai dlaabtsi rua qhov chaw ntawd.
Vaajtswv Txujlug phoo Tshab muab pawg ntseeg pev rua ib paab yaaj hab tug Tswv yug yaaj yog Tswv Yexus (Yauhaas 10). Yexus paub peb txhua tug zoo kawg nkaus. Nwg paub peb tej kev txhawj kev ntshai, peb kev tu ncaab tu ncua, peb tej kev ntshaw huv tuabsi. Yexus yeej tsi tso peb tseg. Peb ca sab tau rua peb tug Tswv Yexus tuab yaam nkaus le Daviv ca sab rua Vaajtswv.
Txawm yog Yexus yog peb tug Tswv yuj yaaj zoo los nwg tseem qha ib tug qauv zoo pub rua peb thaum tej xwmtxheej lug raug nwg hab.
Peb tug Tswv Yexus thaum nwg tseem ua neej nyob nplajteb, nwg tau ntsib ntau yaam xwmtxheej ua rua nwg nyuaj sab heev hab lug kuamuag. Nyob rua huv nwg lub neej muaj ib lub caij nyoog nyuaj tag tag, yog lub sijhawm kws cov tub rog yuav tuaj ntev nwg coj moog tua. Thaum ntawd Yexus tau thov nwg Leejtxiv kuas paab nwg, xob pub kuas tej ntawd lug raug nwg. Tabsis Yexus tau thov has tas kuas txhua yaam ua lawv le nwg Leejtxiv sab nyam (Lukas 22 :42).
Kev noog Vaajtswv lug, kev ncaaj nceeg rua Vaajtswv hab kev txu fwjchim rua ntawm Vaajtswv tug tuabneeg yog 3 yaam kws Yexus qha tau rua peb cov ntseeg coj thaum peb ntsib tej yaam xwmtxheej zoo le ntawd.
Peb yuavtsum tsi txhob tso Vaajtswv hab pawg ntseeg tseg, tsi txhob nov qaab moog pehawm Vaajtswv txhua nubkaaj, tsi txhob saib Vaajtswv tej dlejnum tsi tseem ceeb txawm yog peb ntsib tej yaam xwmtxheej zoo le taamsim nuav.
Peb tsi txhob qhua peb tug Vaajtswv thaum kws peb tau zoo hab muaj noj muaj haus nkaus nkaus xwb tabsis peb yuavtsum ncu ntsoov qhua peb tug Vaajtswv thaum kws peb tiv tej kev txomnyem hab.
Txawm yog peb tug Tswv yuav coj peb moog rua lub tshaav kws muaj zaub mog nyoos ntsuab xab hab rua ntawm lub paag dlej ntshab kws nyob ntsag tu los yog coj peb hlaa taj suabpuam, peb yuav tau noog nwg lug.
Comme dit le Qohéleth, il y a un temps pour toute chose en ce monde, un temps pour naître et un temps pour mourir…un temps pour pleurer et un temps pour rire…un temps pour embrasser et un temps pour s’en abstenir.
Aujourd’hui nous sommes certainement dans une période de deuil, de pleurs mais sachons que des jours heureux viendront aussi, telle est sa promesse. En attendant sachons être obéissants, fidèles et humbles à l’égard de notre Seigneur, celui qui fait toute chose belle en son temps.
Kong Ming Vang
0 commentaires:
Enregistrer un commentaire